راوێژكاری ئاسایشی نیشتمانیی عێراق رایگەیاند ڕێكخراوی تیرۆریستی داعش لە بەرگی ڕێكخراوێكی نوێ دەستی بە جولەکردووەتەوە.
فالح فەیاز بە گۆڤاری "شپیگڵ"ی ئەڵمانی راگەیاند، بەم دواییە داعش دەستی بە جووڵە و چالاكی كردووەتەوە و چەند ئاماژەیەك هەن، كە وای پێشان دەدەن داعش لە بەرگی ڕێكخراوێكی نهێنیی نوێ خۆی ڕێك دەخاتەوە.
وتیشی، بەڵگە و ئاماژەی تەواویان لەبەر دەستە، كە لایەنگرانی داعش ڕێكخراوێكی نوێ دروست دەكەنەوە و بە نیازیشن لەسەر شێوازی ڕێكخراوی تیرۆریستی ئەلقاعیدە درێژە بە کار و چالاكییەكانیان بدەنەوە.
راوێژكاری ئاسایشی نیشتمانیی عێراق باسی لەوەشکردووە، لەو كاتەی هێزە ئەمنییەکان لە شوێنێكی دیاریكراودا راوی داعش دەنێن، بەڵام دەتوانن لە بەرگی ئاوارە مەدەنیەكاندا خۆیان بخزێننە ناو شارەكانی ترەوە و لەنێو خێوەتگەكاندا خۆیان حەشار بدەن، دواتر لە كاتێكی تردا خۆیان ڕێك بخەنەوە و بەرەو ناوچەی چالاكییەكانی خۆیان بچنەوە.