کەمێک پێش ئێستا مەسعود بارزانی، سەرۆکی پارتی دیموکراتی کوردستان سەبارەت بە بارودۆخی هەنوکەیی عێراق پەیامێکی بڵاوکردەوەو دەڵێت" نابێت گۆڕینی دەستوور بسەپێنرێت یان بەزۆر بێت".
لە بەشێکی تری پەیامەکەیدا بارزانی دەشڵێت: دەبێت یاسایی هەڵبژاردن دەربڕی خواستی ڕاستەقینەو دادپەروەرانەی سەرجەم پێکهاتەکان بێت، هەروەها پێویستە گۆڕانکاری لە چوارچێوەی یاسا و میکانیزمە دەستورییەکاندا بێت.
هاوکات لەبەشێکی تری پەیامەکەیدا مەسعود بارزانی وتیشی: نابێت گۆڕینی دەستوور ببێتە هۆی پاشەکشەی مافی گەلی کوردو پێکهاتەکانی دیکە.
سەرۆکی پارتی دیموکراتی کوردستان جەختیشیکردەوە: پێویستە گوێ لەداواکارییەکانی خەڵک بگیرێت و بەتوندوتیژی و خوێنڕشتن کێشەکان چارەسەر نابن، خەڵک ئێش و ئازاری زۆری بینیوە و هاوڵاتی مافی خۆیەتی داواکاریی هەبێت.
ئەمەش دەقی پەیامەکەیە:
بەناوی خودای بەخشندە و میهرەبان
لەبارەی بارودۆخی سیاسیی عێراق و ناڕەزایەتی و خۆپێشاندانی هاووڵاتیان، ئێمە زۆر بە پەرۆشین بۆ ئەو دۆخەی كە هاتووەتە پێش و پێمان وایە كە ئەمەی ئێستا لە ئارادایە هی ئەمڕۆ نییە بەڵكو دەرئەنجام و كەڵەكەبووی فەشەلێكی پازدە ساڵەیە. خەڵك ئێش و ئازارێكی زۆری بینیوە و هاووڵاتی مافی خۆیەتی داواكاری هەبێت و ناڕازی بێت. بۆیە پێویستە گوێ لە داواكاریی خەڵك بگیرێت و بە توندوتیژی و خوێنڕشتن كێشەكان چارەسەر نابن.
لەگەڵ ئەوەیشدا یەكێك لە گرفتە گەورەكانی عێراق جێبەجێ نەكردنی دەستوورە. ئەگەر دەستوور وەك خۆی جێبەجێ كرابا، زۆر لەو كێشانە نەدەبوون كە پێشتر و ئێستایش هەن. لە لایەكی دیكەوە هۆكاری وردی دۆخی ئێستا یاسای هەڵبژاردنە، و، بۆ نەمانی هۆكاری گرفتەكان، دەبێ یاسای هەڵبژاردن بە شێوەیەك بگۆڕدرێت كە ئەنجامەكان دەربڕی خواستی ڕاستەقینە و دادپەروەرانەی سەرجەم پێكهاتەكان بێت.
لەبارەی داواكارییەكان لەسەر گۆڕینی دەستوور، پێمانوایە نابێ گۆڕینی دەستوور بسەپێندرێت یان بە زۆر بێت و لە هەمان كاتیشدا نابێ گۆڕینی دەستوور ببێتە هۆی پاشەكشە لە پڕەنسیپەكانی دیموكراسی و هەروەها پاشەكشەی مافی گەلی كورد و پێكهاتەكانی تر. بە دڵنیاییشەوە سیستەمی دیموكراسی زیاتر لە بەرژەوەندیی خەڵكی عێراقە نەك دیكتاتۆری و هەموو گۆڕانكارییەكیش پێویستە لە چوارچێوەی یاسا و میكانیزمە دەستوورییەكاندا بێت.
مسعود بارزانی
2ـی 11ـی 2019