كاردانەوەكان دژی بڕیاری حكومەتی هەرێمی كوردستان بۆ كەمكردنەوەی مووچە فراوانتر دەبن، بڕیارە ئێوارەی ئەمڕۆ لەشارو شارۆچكەكانی هەرێمی كوردستان خۆپیشاندانێكی ناڕەزایەتی دژ بەبارودۆخی ئێستای هەرێم بەڕێوەبچێت.
ئەنجومەنی رێكخستن و بەڕێوەبردنی خۆپیشاندانەكان لەراگەیەندراوێكدا ئاماژەی بەوەكردووە" كه کاتژمێر ٥:٠٠ی ئێوارەی ئەمڕۆ شه‌ممه خۆپیشاندان دەستپێدەکات و لە هەولێر خۆپیشاندەران دەچنە بەردەم چایخانەی مەچکۆ لەبەردەم قەڵا و لە سلێمانی دەچنە پارکی ئازادی، لە دهۆکیش دەچنە بەردەم پارکی نەورۆز و لە هەڵەبجە دەچنە بەردەم فولکەی عومەری خاوەر".
رێکخەرانی خۆپیشاندانەکەش باس لەوەدەکەن، كه بڕیاریشە لە سەرجەم قەزا و ناحیەکاندا خۆپیشاندان بەڕێوەبچێت ده‌ڵێن" ئەم خۆپیشاندانە سەرتاسەرییە دوا پەیامی هاوڵاتیانە بۆ دەسەڵات و پەیامی ناڕەزایی فەرمانبەرانە بەرامبەر خورانی مافەکانیان".
١٢ی ئەم مانگە خۆپیشاندانی سەرتاسەری لە هەرێمی كوردستان بەڕێوەچوو، ئەنجومەنی رێكخستن و بەڕێوەبردنی خۆپیشاندانەكانیش لە راگەیەندراوێكیدا داوای هەڵوەشاندنەوەی حكومەت و ئەنجومەنی دادوەری و كۆمسیۆن و ئەنجامدانی هەڵبژاردنی پێشوەختەی كرد.