ئەندامێکی لیژنەی یاسای پەرلەمانی کوردستان ڕایدەگەیەنێت" دوای ئەوەی حکومەتی ھەرێم لە ماوەی ڕابردوو ڕاپۆرتی یەکەمی لەبارەی ھەنگاوەکانی جێبەجێکردنی یاسای چاکسازی ڕەوانەی پەرلەمان کرد، بڕیارە ھەفتەی داھاتوو ڕاپۆرتی دووەم ڕەوانە بکات".
خەدیجە عومەر، ئەندامی لیژنەی یاسای پەرلەمانی کوردستان بە ماڵپەڕی فەرمی پارتی ڕاگەیاند" لە ماوەی چەند مانگی ڕابردوودا حکومەتی ھەرێمی کوردستان لەبارەی ئەو ھەنگاوانەی بۆ جێبەجێکردنی یاسای چاکسازی ناویەتی ڕاپۆرتێکی بۆ پەرلەمان ڕەوانە کرد بۆ ئەوەی پەرلەمانیش ئاگاداری وردەکارییەکان بێت. بڕیارە سێ مانگ جارێک ڕاپۆرت ڕەوانە بکەن، بەڵام ئەم جارە ھەندێک دوا کەوت، بۆیە بڕیارە ھەفتەی داھاتوو حکومەت ڕاپۆرتی دووەم لەبارەی یاسای چاکسازییەوە ڕەوانەی پەرلەمان بکات".
باسی لەوەشکرد، حکومەتی ھەرێمی کوردستان ئامادەکاریی کردووە و ڕاپۆرتی خۆی ئامادە کردووە و ڕەوانەی پەرلەمانی کوردستانی دەکات، ئەمەش بەپێی قسەی حکومەتی ھەرێمی کوردستان، چونکە خۆیان باسیان لەوە کردووە سێ مانگ جارێک ڕاپۆرت ڕەوانەی پەرلەمان دەکەن و لیژنەی داراییش داوای لە حکومەت کردووە ڕاپۆرتەکە ڕەوانە بکەن و ئەوانیش ئامادەن ڕەوانەی بکەن.