به‌رێوه‌به‌رایه‌تی ئاسایشی ئیداره‌ی گه‌رمیان بڵاویکردەوە، هێزه‌كانیان ئه‌و چوار تۆمه‌تبار‌یان ده‌ستگیركردووە كه‌ شه‌ش رۆژ به‌ر له‌ ئێستا له‌ بازگه‌یه‌كدا نه‌وه‌ستا بوون ، دوای دۆزینه‌وه‌شیان ده‌ركه‌وت ئاسكێكیان له‌یه‌كێك له‌گونده‌كان كوشتوه‌.

ئاسایشی ئیداره‌ی گه‌رمیان له‌ڕاگه‌یه‌ندراوێكدا بڵاویكرده‌وه‌، "پاش ئه‌وه‌ی شه‌وی ١ لەسەر ٢ی  مانگی حوزەیران تۆمه‌تبارەکان به‌ ئۆتۆمبیلێكی جۆری هۆندای سۆناتا له‌ زاڵگه‌ی ساڵه‌ح ئاغا ده‌ده‌ن و ناوه‌ستن له‌لایه‌ن هێزه‌كانی ئاسایشی گه‌رمیانه‌وه‌ بۆ دۆزینه‌وه‌یان ده‌ست به‌ لێكۆڵینه‌وه‌ی ورد و كۆكردنه‌وه‌ی زانیاری ته‌واو كرا، توانرا رۆژی دووشه‌ممه‌ ٦ی حوزەیران،  هه‌ر چوار تۆمه‌تبار كه‌ به‌ڕه‌گه‌ز كوردن و دانیشتووی شاری كه‌لارن ده‌ستگیربكرێن".

ئاماژه‌ی به‌وه‌شكردوه‌، له‌كاتی لێكۆڵینه‌وه‌دا له‌گه‌ڵ هه‌ریه‌ك له‌ تۆمه‌تباره‌كان ده‌ركه‌وت له‌ (گوندی حه‌وش كوڕو) ئاسكێكیان كوشتوه‌ و نه‌یانویستوه‌ له‌بازگه‌كه‌ راوه‌ستن.

له‌ئێستاشدا له‌لایه‌ن دادوه‌ری لێكۆڵینه‌وه‌وه‌ هه‌ر چوار تۆمه‌تباره‌كه‌ به‌ پێی ماده‌ی ٢٤٠ی یاسای سزادانی عێراقی راگیراون، هه‌روه‌ها ده‌ستگیراوه‌ به‌ سه‌ر ئۆتۆمبێله‌كه‌یاندا و لێكۆڵینه‌وه‌ش به‌رده‌وامه‌.