بافڵ تاڵەبانی لەچاوپێكەوتنێكی كەناڵی (رووداو) سەبارەت بەوەی نێوانیان لەگەڵ پارتی چۆنە وتی "قسەی راستی بێت. ئێمە هەموو هەوڵێكمان داوە و بەردەوامیشین لە هەموو هەوڵێك. زیاد لە 16 جار چوومەتە لای جەنابی كاك مەسعود، چەندین شاندی ئێمە چووە بۆ لای برادەرانی پارتی. دەیان جار تەلەفۆنمان كردووە، بە دەیان جار هەوڵمانداوە. من حس دەكەم نا تێگەیشتنێك هەیە لە نێوان ئێمە و برادەرانی پارتی. ئەوەڵ جار تەسەورم دەكرد دەستێك بێت، ئێستاش تەسەور دەكەم دەستێكی تێدایە".

 

بافڵ تاڵەبانی وتیشی "ئەوەی موهیمە با تەركیز بخەینە سەر ئەوەی كە دەمانەوێت وابێت وەزعەكە یان نامانەوێت وابێت؟ من بۆ عیلاج دەگەڕێم. ئێمە حەز دەكەین لەگەڵ پارتی خزمەتی میللەتەكەمان بكەین، حەز دەكەین حكومەتەكەمان بە قووەت بێت و حكومەتی هەموو لایەك بێت. حكومەتەكەمان خزمەت بە ئەملا بكات و خزمەت بە ئەولا بكات، ئەوەی كە من دەیبینم ئەمڕۆ غەڵەتە بە دڵم نییە، جۆرێكە لە دوو ئیدارەیی. ئەمە پێموانییە یارمەتی وەزعەكە بدات بە هیچ نەوعێك.. شتەكانیش ئەوەندە قورس نین، هەموومان دەزانین خەڵك ئەمڕۆ چی دەوێت؟ خەڵك ئەمڕۆ پێویستی بە چییە؟ بەس بە داخەوە لەناو حكومەتدا تا ئێستا نەمانتوانیوە بگەینە لەیەك تێگەیشتنێكی باش".

 

دەربارەی جیاكاری كردن لە داهاتی سلێمانی كە ئەو پارەیە بۆ سلێمانی خەرج ناكرێتەوە، بافڵ تاڵەبانی وتی "ئێستا داهاتی سلێمانی، ئێمە چەند ئیجرائاتێكمان كردووە، چەند رەقەمێكیشم هەیە بۆ جەنابت. هەر لەو مانگە داهاتی سلێمانی سێ قات بووە، بەڵام ئێمە كێشەی جیددیمان هەیە لەم زۆنە. با پێت بڵێم یەكێك لە نموونەكان ئەوەیە، باسی حدودەكانمان دەكەن. باشە حدودی ئەملا قەت ناتوانێت داهاتی بەقەد حدودی ئەولابێت. ئێمە حدودمان هەیە لەگەڵ ئێران كە زەرەرێكی زۆر گەورەی لێدراوە لە حاجی ئۆمەران بە كردنەوەی ئەو ترانزێتە. بێجگە لە ئەوەش لە ئەملاوە بە مونزریەدا ئێستا هەموو شتێك دەڕوات، ئەمە یەعنی چی؟ یەعنی داهاتی سلێمانی دێتە خوارێ. مقابیل بەوەش لە هەولێر حدودی توركیا هەیە، نەك بەس بۆ هەولێر، بۆ هەموو عێراق لەوێوە داخڵ دەبێت. حدودی ئێرانیش هەیە، حدودێكیش هەیە رەسمییە نا رەسمییە نازانم زۆر لەو شتانە نازانم لەگەڵ سووریا. هەموومان دەزانین چی دێت و دەڕوات لەو شوێنانە.. ئێ باشە چۆن داهاتی ئێمە هی سنووری ئێمە وەكو داهاتی سنووری ئەوان دەبێت؟ ئێمە داوای لامەركەزیەتمان كرد، داوای دوو ئیدارەییمان نەكردووە. ئەوەی كە ئێمە دەیبینین بە راستی دوو ئیدارەییە".

 

بافڵ تاڵەبانی وتیشی "273 شەریكە لە سلێمانیدا ئیفلاسی كردووە. ئەمە بەشێكە لە كێشەكانمان. یەك هەزار پرۆژە لێرە وەستاوە، نە بینایەك، نە جادەیەك، نە مەكتەبێك، هیچ دروست ناكرێت، هەمووی وەستاوە. مزگەوت مزگەوت، مزگەوتیان راگرتووە، عەلەل ئەقەل مزگەوتەكانمان دروست بكەن، بۆ مزگەوتەكان رادەگرن؟ یەعنی لێرە جەوێكیان دروستكردووە هیچ ئیش ناڕوات، هیچ پرۆژە ناكرێت، هیچ شتێك ناكرێت. 31 هەزار كۆمپانیا هەیە كە باج دەدەن، 7 هەزاریان لە سلێمانییە. 4 هەزاریان ئێستا ئیش ناكات، چونكە هەموو پرۆژەكانیان وەستاوە".

وتیشی "ئێ باشە باجەكەی ئێمە چۆن وەكو ئەولا دەبێت؟ تۆ بەس تێم بگەیێنە 7 هەزار شەریكە دەتوانێت عەینەن باج بدات وەكو 24 هەزار شەریكە؟ ئەمە مەنتقی تێدا نییە. ئەمە ماتماتیكی زۆر زۆر بەسیتە.. ئەمە پێویستی بە خەڵكی زۆر شارەزا نییە، ناكرێت رەقەمەكان یەك ناگرنەوە. راست دەكەن؟ وەرنە پێشەوە... وەرنە پێشەوە لەگەڵمان داهاتی هەموو سنوورەكان، هەموو باجەكان، هەمووی با بچێتە یەك سندووق، چ شەریكەیەكیان دەوێت لە دونیادا با بێت دیراسەی بكات، بە جوانی تەوزیعی بكەن هەموو لایەنەكان، وەكو حكومەتی شوێنانی تر.. من خۆم بەخێوەكەم تۆش بەخێوەكەم و ئاوهاش بێت وەزعەكە؟ ئێمە بۆ هەموو شتێك ئامادەین، هیچ لە خۆمان ناترسین، چ شەریكەیەك دەهێنن لە كوێوە دەیهێنن، ئەو شەریكە با بێت دیراسەی ئەو شتە بكات.. هەموو حدودەكان یەك بخەینەوە بە ئەوەی سووریاوە، با هەموو نەوتەكە یەك بخەینەوە بە ئەوەی عەین زالەوە، باجەكان هەمووی كۆبكرێتەوە هەمووی بۆ شوێنێك بڕوات و لەوێوە تەوزیع بكرێت بەس بە عەدالەت.. ئێمە ئامادەین".

 

سەبارەت بە ئەنجامدانی هەڵبژاردنی پەرلەمانی كوردستانیش، بافڵ تاڵەبانی وتی "باشە ئێستا من چاڵێنجیان دەكەم، چاڵنجێكی رەسمی بۆ پارتی دیموكراتی كوردستان، وەرن قانوونێك دانێن كە لە قانوون بچێت، حەلێكم بۆ بدۆزنەوە بۆ تالی سەنتەر و جۆری ژماردنی دەنگەكان، لیستێكی دەنگدەر هەبێت كە حەقیقی بێت و واقیعی بێت، لە هەمووی موهیمتر كەمینەكان بتوانن نوێنەرایەتی خۆیان بكەن، ئێمە سبەی ئینتیخابات دەكەین. شتێكم داواكردووە كە نامەتقی بێت؟ نەخێر، ئەوەی كە من داوای دەكەم لە هەموو وڵاتێكی دیكە هەیە، وەرە كاكە قانوونەكە با قانوون بێت. بۆ بچمە ناو ئینتیخاباتێك كە دەزانم نەتیجەكەی چییە، لە بە نەوعێك قانوونەكە نووسراوە، بە نەوعێك شتەكان دابەشكراون كە نەتیجیەكەی وازح بێت. كێ ئەمە دەكات؟ من ئەوە ناكەم".

 

سەرۆكی یەكێتی وتیشی "ئەمە سیستمێكی فیدراڵە، زۆر جۆری سیستمی فیدراڵ هەیە، بشگاتە دوو ئیدارەیی زۆر خراپە. من حەزم لەوە نییە. هەرێمەكەمان نەمێنێت ئێمە زەرەرمەندین. بەڵام ئەگەر ئەم بارودۆخە هەروا بەردەوام بێت، بە راستی خەڵك دەبێت ئەو پرسیارە لە خۆی بكات. زۆر بە خراپیش ئەو دوو ئیدارەییە باس دەكرێت، پێیانوایە زەرەرمەند زۆنی سلێمانی دەبێت. بەو خوایە ئەولا بە قەد ئێمە زەرەر دەكات، ئەگەر زیاتر زەرەر نەكات. دوو سێ نموونەی سادە، كارەبا لە كوێیە؟ هەمووی لێرەیە. نەوتی كوردستان تەواو بووە. چەند ساڵێكیتر تەواو دەبێت. ژیانی كورتە. هەموو غازەكە لێرەیە. ئەو نەوتەی كە هەیە، بەبێ نەوتەكەی ئەولا كە دەبێت میكسی بكەیت، تاوەكو رەقەمەكەی بەرزبێتەوە، نەوتی ئەولا هیچ قیمەتی نییە. ئێ ئەوە قازانجی منی تێدا نییە، بەس بەخوا قازانجی ئەوانیشی تێدا نییە".

دەربارەی ئەوەی دوای ئەوەی پۆستی سەرۆك كۆمار لە بەغدا یەكلایی بووەوە، چاوەڕێ دەكرا بەینی ئەون و پارتی باش بێت، ئێستا خەریكە لەسەر وەزیری ژینگە دیسان نیقاش دروست دەبێتەوە، بڕیارتان بۆ ئەوە چییە؟ بافڵ تاڵەبانی "هەموو شتێك، هەمووی بەیەكەوەیە. ئێمە بەیەكەوەین یان بەیەكەوە نین؟ شەریكین یان شەریك نین؟ ئەمەیە. ئەو بڕیارە بدەین، ئا یان نا، بڕوابكە شتەكانی دیكە زۆر ئاسانە. بەڵام دەبێ ئەو بڕیارە بدرێت، ئێمە لە هەموو روویەكەوە ئامادەین، ئیسپاتیشمان كردووە كە ئامادەین".