ئەمڕۆ چوارشەممە نێچیرڤان بارزانی پێشوازی لە وەزیری دەرەوەی ئەڵمانیا كرد و تاوتوێی دۆخی ئاوارە و پەنابەران لە هەرێمی كوردستان و چەند پرسێكی دیکە کرا.
بەپێی ڕاگەیەندراوێکی سەرۆکایەتی هەرێم، ئەمڕۆ ٨ی ئادار نێچیرڤان بارزانی سەرۆكی هەرێمی كوردستان (ماوە بۆ درێژکراوە) لەگەڵ ئەنالینا بێربوك وەزیری دەرەوەی ئەڵمانیا کۆبووەوە، لە كۆبوونەوەیەكدا نێچیرڤان بارزانی دووپاتیكردەوە كە هەڕەشەكانی تیرۆر هێشتا بەردەوامن، بۆیە عێراق و هەرێمی كوردستان پێویستیان بە بەردەوامی پشتگیری ئەڵمانیا و كۆمەڵگەی نێودەوڵەتی هەیە.
لای خۆیەوە بێربوك ئاماژەی بەوەکرد، کە ئەڵمانیا بە بایەخەوە لە پێوەندییەكانی لەگەڵ عێراق و هەرێمی كوردستان و ئارامی و سەقامگیری سیاسی و ئابوورییان دەڕوانێت.
هەروەها وەزیری دەرەوەی ئەڵمانیا ئاماژەی بە گرنگی جێبەجێكردنی ڕێككەوتنی هەرێم و عێراق بۆ ئاساییكردنەوەی دۆخی شنگال كرد كە دەبێتە هۆی گەڕانەوەی ئاوارەكان و ئاوەدانكردنەوەی ناوچەكە.
بەپێی ڕاگەیەندراوەکە، پەیوەندییەكانی نێوان هەولێر و بەغداد تەوەرێكی تری كۆبوونەكە بوو کە تێیدا نێچیرڤان بارزانی ئاماژەی بە هەبوونی كەشێكی ئەرێنی گفتوگۆی نێوان هەردوولا بۆ چارەسەركردنی كێشەكان كرد، هەروەها ئاماژەی بە هاوئاهەنگی پتەوی نێوان سوپای عێراق و پێشمەرگە بۆ بەرەنگاربوونەوەی داعش كرد.