دەروازەی نێودەوڵەتیی ئیبراهیم خەلیل رایدەگەیێنێت، "لە ئەمڕۆوە بە مەبەستی نەهێشتنی قەرەباڵخی، میکانیزمی نوێی چوونی گەشتیاران بۆ تورکیا جێبەجێ دەکرێت".
ئەمرۆ سێ شەممە ١٥ی ئابی ٢٠٢٣، دەروازەی نێودەوڵەتیی ئیبراهیم خەلیل رایگەیاند"دوو رێگە دەکرێنەوە بۆ ئەوەی گەشتیاران لێیەوە بچنە تورکیا، بەوەش ئیدی نۆرەی ئەو گەشتیارانەی کە لە ماوەی ١٥ رۆژدا سەردانی تورکیایان نەکردووە، جیادەبێت لەو گەشتیارانەی کە بەردەوام یانیش رۆژانە هاتووچۆی تورکیا دەکەن، بۆ هەر مەبەستێک بێت".
کامی کەمال، گوتەبێژی کۆمەڵگەی دەروازەی نێودەوڵەتیی ئیبراهیم خەلیل لە راگەیێندراوێکدا دەڵێت، "ئەو هەنگاوە لەدوای کۆبوونەوە و هەوڵی سەرپەرشتیارانی دەروازەکە و لایەنە پەیوەندیدارەکانی حکومەتی هەرێمی کوردستان لەگەڵ لایەنە پەیوەندیدارەکانی تورکیا هاتوووەتە ئاراوە و ئەمڕۆ گەیشتوونەتە ئەنجام و لایەنی تورکیاش بۆ ئەو مەبەستە هاوکاریی پێشانداوە".
رۆژانە پێنج هەزار بۆ ١٠ هەزار گەشتیار لە دەروازەی نێودەوڵەتیی ئیبراهیم خەلیل هاتووچۆ دەکەن کە زۆربەیان لە هەرێمی کوردستانەوە گەشت دەکەن.