هێزەکانی پاراستنی گەل رایدەگەیەنن لە شەڕی زاپی ١٧ی شوباتدا کە گەریلا هێرشیکردە سەر چەند بنکەی سوپای تورکیا ٣٧ سەرباز کوژران.
لە راگەیاندنێکدا پارتی کرێکارانی کوردستان رایگەیاند " ١٧ ی شوبات کاتژمێر ١٢:٥٠ لە رۆژئاوای زاپ، لە دژی ئەو داگیرکەرانەی لە گۆڕەپانێکی سەرەکی بارەگاکە جێگیر ببوون، گەریلا ئۆپراسیۆنێکی شۆڕشگێڕی بە تاکتیکی هێرشبەرانە دەستیپێکردو، لە چەندین قۆڵەوە لە سەنگەرەکانی دوژمن درا، سەنگەرەکان تێکشکێندران و کۆنترۆڵکران".
لە راگەیاندنەکەدا ئاماژە بۆ ئەوە کراوە کە گەریلا چوونەتە سەر دوژمن، بە خێرایی گۆڕەپانی بارەگاکەی لە دوژمن پاککردەوە، چوونە سەر تەرمی داگیرکەران و دەستیان بە سەر چەندان چەکی جۆراوجۆردا گرت و، دواتر هەموو بنکەکانی سووپای تورکیا و خێمە و کۆنتینەرەکان بە تەواوەتی سوتێندران.
" لەو ئۆپراسیۆنەدا ١٥ سەنگەر، ٧ کۆنتینەر، جبەخانەیەک، ناوەندێکی پەیوەندییەکان، ناوەندێکی چاودێری، ٢ چەکی ئەی فۆر، چەکێکی نارنجۆکهاوێژ، ٢ سیستمی رادار و ٥ کامێرای چاودێری حەراری بە تەواوەتی لەناوبران".( راگەیاندنی پەکەکە).
دەستکەوتەکانی گەریلا وەک لەراگەیاندنەکەدا هاتووە" ٨ چەکی ئێم پی تی- ٥٥ی کەسی، ٨ مەخزەنی چەکی ئێم پی تی-٥٥، ٥ چەکی ئۆتۆماتیکی بی کەی سی، لولەیەکی چەکی ئۆتۆماتیکی بی کەی سی، ٣٠٠ فیشەکی بی کەی سی، چەکێکی نارنجۆکهاوێژی یەکدانەیی، ٣ چەکی نارنجۆکهاوێژی، چەکێکی نیشانەشکێنی جۆری بۆرا، مەخزەنێک و کەلوپەلەکانی، چەکێکی بۆمبهاوێژی بی-٧، ٢ چەکی پۆمپەیی، دەمانچەیەک، ٨ کامێرای دوربیندار، ٤ دوربینی شەو، دوربینێکی رۆژ، ١١ دووربینی چەک، ٢ ئامێری دەستنیشانکردن، ئامێرێکی بێتەلی گەورە و پاتریەکەی، چوار ئامێری بێتەل، ٢ نارنجۆکهاوێژ، ٣ لەیزڕی ئاماژەدان، ٣ کامێرای بۆسەدانان، ٢ پانێلی وزەی خۆر، ٢ کامێرای حەراری، ٧ پاوەربانک، تلیسکۆپێک، باتریەکی بارگاویکردن، کڵاوێکی سەربازی، ٢ هەستەوەر، ٣ تەلەفون و جانتایەکدا گیرا".
دەربارەی زیانە گیانییەکانی گەریلاکانی پەکەکە، لە راگەیاندنەکەدا هاتووە " یەک گەریلا شەهیدبووە ".
پەکەکە میدیای تورکیا بەدرۆدەخاتەوە کە تەنها سەربازێکیان کوژراوەو، سەربازێکیشیان برینداربووەو، جەخت لەسەر کوژرانی ٣٧ سەربازی تورکیا دەکاتەوە لەو هێرشەی گەریلادا.