بزوتنەوەی گۆڕان دژایەتی بۆ بڕیارەکەی دادگای فیدراڵی سەبارەت بە هەڵوەشاندنەوەی کورسی کۆتای پێکهاتەکان لە پەرلەمانی کوردستان ڕاگەیاند.
دلێر عەبدولخالق، وتبەێژی بزوتنەوەی گۆڕان لە لێدوانێکیدا بۆ میدیای فەرمی حزبەكەی ڕایگەیاند" بڕیارەكەی دادگای فیدراڵی عێراق سەبارەت بە سیستمی چوار بازنەیی بڕیارێكی باشە، ئەوەی پێمان باش نییە هەڵوەشاندنەوەی کورسی پێکهاتەکانە''.
وتیشی'' ئەگەر ئەوە پاساوەکەی نادەستوریبوونیەتی بۆ چی لە ئەنجومەنی نوێنەرانی عێراق و ئەنجومەنی پارێزگاکان کورسی کۆتا هەیە، بۆچی ئەمە بۆ دەوڵەتی عێراقی فیدراڵ ڕەوایە بۆچی بۆ هەرێمی کوردستان ڕەوا نییە''.
ئەم لێدوانەش دوای ئەوە هات کە ڕۆژی چوارشەممەی ڕابردوو دادگای فیدراڵی لەسەر بنەمای سکاڵایەکی یەکێتی، بڕیاری هەڵوەشاندنەوەی ١١ کورسییەکەی کۆتای پێکهاتەکانی دا و ژمارەی کورسییەکانی پەرلەمانی کوردستانی لە ١١١ کورسییەوە بۆ ١٠٠ کەم کردەوە.