کۆمسیۆنی باڵای سەربەخۆی هەڵبژاردنەکان لەگەڵ نوێنەری لایەنە بەشداربووەکانی هەڵبژاردنی پەرلەمانی کوردستان کۆدەبێتەوە و مەرجەکانی خۆکاندیدکردنیش ئاشکرا کران.
ئەمڕۆ یەکشەممە، فەرهاد ئەسعەد، بەرپرسی هۆبەی پارتەکان لە نووسینگەی هەولێری کۆمسیۆنی باڵای سەربەخۆی هەڵبژاردنەکانی عێراق ڕایگەیاند" سبەینێ لەگەڵ نوێنەری ٣٩ پارتە تۆمارکراوەکە کۆدەبنەوە بۆ خستنەڕووی میکانیزمی ئەنجامدانی هەڵبژاردنی پەرلەمانی کوردستان کە بڕیارە ڕۆژی ١٠ی حوزەیرانی داهاتوو بەڕێوەبچێت".
فەرهاد ئەسعەد ئەوەشی خستەڕوو، هەر کەسێک تا ڕۆژی دەنگدانی تایبەت تەمەنی بگاتە ٢٥ ساڵ، دەتوانێت خۆی بۆ هەڵبژاردنەکە کاندید بکات و بۆ هەر کاندیدێکی سەربەخۆش بڕی ملیۆنێک دینار، لە لایەنە سیاسییەکان پێنج ملیۆن و لە هاوپەیمانییەکانیش ١٠ ملیۆن دینار بۆ خۆتۆمارکردن وەردەگیرێت.
ڕاشیگەیاند" دەبێت کاندیدەکە بە فلتەرەکانی دەستەی دەستاکی، پێشینەی تاوان و یاسای ڕیشەکێشکردنی بەعسدا تێپەڕبێت و تا ١٤ی ئەم مانگە ناوی کاندیدەکان وەردەگیرێن".
هەڵبژاردنی پەرلەمانی کوردستان لە ١٠ی حوزەیراندا بەڕێوەدەچێت و بە پێی بڕیاری دادگای فیدراڵی کورسی کۆتاکان نەمان و کورسییەکانی بۆ ١٠٠ ژمارە کەم کرایەوە و بڕیارە کۆمسیۆنی باڵای هەڵبژاردنەکانی عێراق هەڵبژاردنەکە بەڕێوە ببات.