هێزە ئەمنییەكانی دهۆك رێگرییان لە گردبوونەوەیەكی ناڕەزایی كرد كە تێیدا داوای دادگاییكردنی ئەو كەسانە دەكرا كە بەرپرس بوون لەو رەوشەی بەسەر كوردستاندا هێندرا.
چیا بێلیزانی ڕۆژنامەنووس و بەشدار لە گردبوونەوەکەی دهۆك، بە ڕۆژنیوزی ڕاگەیاند " وەك کۆمەڵێك ڕۆژنامەنووس و چالاکوان بۆ دۆخی ئەمڕۆی باشوری کوردستان کە بەرپرسان بەسەریاندا هێناوە، کۆمەڵێك ڕۆژنامەنووس و چالاکوان ویستمان لە گردبوونەوەیەکدا بەیاننامەیەك بخوێنینەوە، بەڵام لەلایەن هێزە ئەمنییەکانەوە پەلامارمان دراو ڕێگریمان لێکرا".
ناوبراو وتیشی " ئێمە بۆ یەکڕیزی کورد هەوڵماندا، بەڵام ڕێگرییمان لێکرا، هیزێکی زۆری ئەمنییان هێنایە سەرمان، بە تەنها ڕێگرییشەوە نەوەستان و سوکایەتییەکی زۆریان پێکردین".
دەربارەی ناوەڕۆکی بەیاننامەکەیان، چیا روونیكردەوە كە لە بەیاننامەكەیاندا داوایان کرد سیاسەتێکی نیشتیمانی و سەردەمیانە بۆ دانوستاندان لەگەڵ بەرامبەردا پەیڕەو بکرێت و بەرپرسانی ئەو رەوشەش دادگایی بكرێن.
پێكهێنانی هیزێکی یەکگرتووی دوور لە حزبایەتی یەكێكی دیكە بووە لە داواكارییەكانیان.
چیا ئاماژەی بەوەشکرد، کە داوایان کردووە، دوای ئەوەی ٥١%ی خاکی باشوری کوردستان بەدەست حکومەتی ناوەندەوە درا، بەرپرسانی بازرگان بە خوێنی شەهیدانەوە دادگایی بکرێن.