ئەردۆغان سەردانی عێراق دەکات

سەرۆك كۆماری توركیا پەیوەندیەكی تەلەفونی لەگەڵ سەرۆك وەزیرانی عێراق ئەنجامدا و ئاشكرایكرد ئامادەكاری دەكات بۆ ئەوەی سەردانی عێراق بكات. 

 

نوسینگه‌ی راگه‌یاندنی سه‌رۆك وه‌زیرانی عێراق بڵاویكرده‌وه‌" ئێواره‌ی ئه‌مڕۆ ره‌جه‌ب ته‌یب ئه‌ردۆغان له‌رێگه‌ی ته‌له‌فۆنه‌وه‌ په‌یوه‌ندی به‌ مسته‌فا كازمیه‌وه‌ كردوه‌ و پیرۆزبایی ئاراسته‌ی كردوه‌ به‌بۆنه‌ی ده‌ستبه‌كاربونی وه‌ك سه‌رۆكی حكومه‌تی نوێی عێراق".

ئاماژەی بەوەشداوە" ئەردۆغان ئاماده‌یی وڵاته‌كه‌ی بۆ پشتیوانیكردنی عێراق له‌روی سیاسی و ئه‌منی و ئابوریه‌وه‌ ده‌ربڕیوه‌ و رایگه‌یاندوه‌، بەڵێن دەدات كە  ده‌یه‌وێت به‌مزوانه‌ سه‌ردانی به‌غداد بكات بۆ زیاتر گفتوگۆكردن له‌ په‌یوه‌ندیه‌كانی نێوان هه‌ردولا له‌چوارچێوه‌ی رێكه‌وتنه‌كانیان و له‌سه‌ر بنه‌مای رێزگرتن له‌سه‌روه‌ری و یه‌كڕیزی خاكی هه‌ردو وڵات".

لەبەشێكی دیكەی راگەیەندراوەكە هاتووە، له‌لای خۆشیه‌وه‌، مسته‌فا كازمی سوپاسی سه‌رۆك كۆماری توركیای كردوه‌ و رایگه‌یاندوه‌، له‌سه‌ر بنه‌مای متمانه‌ و رێزگرتن، عێراق ده‌یه‌وێت په‌یوه‌ندی هاوبه‌ش و به‌هێزی له‌گه‌ڵ توركیا هه‌بێت.

هەروەها مسته‌فا كازمی رایگه‌یاندوه‌" له‌پێشوازیدا ده‌بن هه‌ركاتێك سه‌ردانی عێراق بكات و سه‌ردانی به‌رده‌وامی هه‌ردولاش، به‌شێكه‌ له‌ گرتنه‌به‌ری هه‌نگاوه‌كانی پرۆسه‌ی به‌هێزكردنی په‌یوه‌ندیه‌كانی نێوان توركیا و عێراق".

هه‌ر به‌گوێره‌ی راگه‌یه‌ندراوه‌كه‌، له‌به‌شێكی په‌یوه‌ندیه‌ ته‌له‌فۆنیه‌كه‌دا گفتوگۆ له‌سه‌ر پشكی ئاوی نێوان هه‌ردو وڵات، ئاسانكاری بۆ ئاڵوگۆڕی بازرگانی و وه‌به‌رهێنان، هه‌روه‌ها رۆڵی كۆمپانیاكانی توركیا له‌بواری وزه‌ و بونیادنانه‌وه‌ی عێراقدا كراوه‌.



ئه‌م بابه‌ته ‌498 جار خوێنراوه‌ته‌وه‌‌

PM:10:56:15/05/2020