ساڵی ١٩٨٦ لە یەمەنی باشور، کە دەوڵەتێکی مارکسیستی بوو، ناکۆکیەکی توند لەسەر پۆست و مەرجەعییەت و قۆرخکاری لە بەرێوەبردنی حزبی سۆسیالیستی باڵادەست و دەزگاکانی دەوڵەتدا روی دا، لە کۆبونەوەیەکی مەکتەبی سیاسی ئەو حزبەدا، تەقەکردن رودەدات و بەشێک لە سەرکردە باڵاکانی ئەو حزبە بەدەستی پاسەوانی نەیارەکانیانەوە دەکوژرێن کە بەرچاوترینیان عەبدول فەتاح ئیسماعیل رابەری بەرجەستەی ئەو حزبە بوو. لە ئاکامدا شەڕێکی ناوخۆی سەخت و دژوار و کاولکار دەستی پێکرد، کە هەزاران قوربانی و وێران بونی عەدەنی پایتەخت و ولاتی لێبەرهەم هات و، دواجاریش ولات تەسلیم بە یەکگرتنەوە لەگەڵ یەمەنی باکور بە سەرۆکایەتی عەلی عەبدوڵا ساڵح کرا، و بەوە رازی بون کە عەلی عەبدوڵا سەرۆکایەتیان بکات.
بە کورتی لە ئاکامی ئەو ململانێ ناوخۆییە توند و ماڵوێرانکەرەدا، هەم خۆیان بون بە قوربانی، یا کوژران وەیا دەربەدەر بوون، هەم شار و وڵاتەکەیان وێران بوو، هەمیش ناچار بون ئیدارەی ولاتەکە تەسلیم بە نەیارە مێژویەکەیان: عەلی عەبدوڵا ساڵح بکەن.
لە ئێستاشدا یەکیتی نیشتمانی کوردستان لە ململانێیەکی ناوخۆیی سەختدایە، ئەندامە باڵاکانی لە ناکۆکیەتی قولدان، بەشی زۆری ئەو بەرپرسە باڵایانە( مەکتەب سیاسی و سەرکردە باڵاکان) هێزی چەکدار و فەوج و لیواو و مەفرەزەی تایبەتی خۆیان هەیە. دەوترێت هەندێکیان کۆمپانیاو بەرژەوەندی ئابوری زۆر و زەوەندیان هەیە. ئەم ململانێیە ساڵانێکە جەستەی یەکێتی هەلاهەلا کردوەو تادێت بە ئاراستەی توندتر بون و دژوارتربوندا دەڕوات. بەداخەوە هیچ ئاسۆیەک نیە بۆ ئەوەی ئەو باڵ و بەرژەوەندیانە لەسەر خوانێکی هاوبەش کۆببنەوە. ئەو کەسەی ساڵانێکی دورودرێژی تەمەنی ئەو حزبە دەیتوانی هەموو جەمسەرەکان لە ژێر باڵی خۆیدا بساکێنێت، ئێستا لەسەر گۆڕەپانی سیاسی و ئیدارەی حزبەکەی نەماوە. حزبەکەش هەم هێزێکی چەکداری بەرفراوان و جەنگاوەری هەیە، هەم دەزگای چەکداری تر، هەم پارەو پولێکی زۆر و زەوەند، هەم کۆمپانیا و ئیدارەی گشتی و کێڵگەی نەوت...هتد
هەمیش باڵادەستە لە ئیدارەدانی سنورەکانی ئیدارەی سەوزی جاران. لە غیابی هێزی چەکداری تردا( کە بەداخەوە پێ ناچێت گۆڕان بە جدی بیر لەو هەنگاوە پێویستە بکاتەوە) هیچ هێزێکی تر لە ناوچەکە نامێنێت بۆ راگرتنی هاوسەنگی و رێگەگرتن لە خوێنرشتنی براکان لەسنوری ئیدارەی یەکێتیدا. ئەم ململانێیانە گەر بە شێوازی ئاشتیانەو بە عەقڵ و مەنتق و لە چوارچێوەی بەرژەوەندیە باڵاکانی حزبەکەو ناوچەکەو هەرێمەکە تەواو نەبێت، ئەوا هەموو ئەگەرێکی خراپ چاوەرێمانە. ئەوەی ئەو ئەگەرانەش ئەکاتە واقع، بونی چەک و چەکداری بەشی زۆری ئەندامە بالاکانە کە چواردەوریان بە مەفرەزەی پاسەوانی و فەوجی تایبەت دراوە، لەو کەش و هەوا شەحنکراوە بە بوغز و کینە و یەکتر قبوڵنەکردن و قسە بەیەکتر وتن و تەشهیر بەیەک کردن، لە بونی ئەو هەمووخەڵکە ئینتهازی و بێ پرەنسیپانەی چاوەرێێ تیکەی چەورن لە ململانێی بەرپرسە باڵاکان، ئا لەم کەش و هەوایەدا، چاوەرێی هەموو ئەگەرێکی خراپ و ماڵوێرانکەر دەکرێت.
ئەگەر دواجار عەقڵ میوانی هەموو لایەک نەبێت، ئیرادەیەک نەبێت بۆ چارەسەرکردنی کێشەکان و دیاریکردنی مەرجەعیەتەکان، فشارێک نەبێت لە لایەنەکانی تر بە تایبەت گۆڕان و بە تایبەت تر کاک نەوشیروان مستەفا کە تا ئێستا خاوەن نفوزێکی مەعنەوی بەرچاوە لە نێو بەشێک لە فەرماندەکانی یەکێتیدا، ئەوا دوور نییە هەمان چارەنوسی یەمەنی باکوور لێرەش دووبارە نەبێتەوە.