حکومەتی عێراق سنورەکانی خۆی لەگەڵ سوریا پتەو دەکات و، وەزیری ناوخۆ تەواوبوونی دیوارێکی نێوان هەردوو وڵاتی راگەیاند.
عەبدولەئەمیر شەمەری وەزیری ناوخۆی عێراق ئەمڕۆ یەک شەممە ٢٨ ی کانوونی دووەم تەواو بوونی ئەو دیوارە کۆنکرێتییەی لە مەراسیمێکدا بە میدیاکان راگەیاند کە بۆ پاراستنی سنوورەکانی عێراق لەگەڵ سوریادا دروستکراوەو وتی" ئامانجیان ئەوەیە لە رێگایەوە سنوورەکان لە گروپە چەکدارەکان و قاچاغچێتی بپارێزن."
شەمەری لە درێژەی قسەکانی لەو مەراسیمەدا وتی" ئەو دیوارە بە مەبەستی پاراستنی ئاسایشی سنوور دروستکراوە لە دزەکردنی گروپە چەکدارەکان و قاچاغێتی ماددەی هۆشبەر و چەک".
تەحسین خەفاجی وتەبێژی فەرماندەیی ئۆپەراسیۆنە هاوبەشەکانی عێراق لەبارەی دیوارەکەوە وتی " دیوارەکە درێژەپێدەری دیوارێکی پێشووە کە دوو ساڵ لەمەوبەر کاری لەسەر کراوە، درێژییەکەی ٥٠ کیلۆمەتر دەبێت و ١٥ ملیار و ١٤٠ ملیۆن و ٤٠٠ هەزار دیناری تێدەچێت، بڕیاریشە جێبەجێکردنی دیوارەکە بەردەوام بێت تاوەکو تەواوی ٦٠٠ کیلۆمەتری سنووری عێراق و سوریا بگرێتەوە".